महापालिकेच्या पाणीपुरवठा विभागातले निवृत्त ऑपरेटर धनंजय मिरखेलकर यांचा मुलगा आदित्यने युपीएससी परीक्षेत घवघवीत यश मिळवले असून, तो १५५व्या क्रमांकाने उत्तीर्ण झाला आहे. विशेष म्हणजे त्याची आई धनश्री या देखील पालिका शाळेत शिक्षिका होत्या. आदित्यचे शिक्षण देखील महापालिका शाळेतून झाले आहे. 

युपीएससी परीक्षेचा अंतिम निकाल शुक्रवारी जाहीर झाला. त्यात आदित्यला १५५वा रँक मिळाला. निकाल जाहीर झाल्यावर,  तो म्हणाला, 'या निकालामुळे मी खरोखरच आनंदीत आहे. चार-पाच वर्षांपासून तयारी करीत होतो. त्याला यश मिळाले आहे. युपीएससी परीक्षा उत्तीर्ण होण्याचे स्वप्न प्रत्यक्षात आले आहे. समाजासाठी काम करण्याची चांगली संधी या निमित्ताने मिळाली आहे. रँक चांगला मिळाल्यामुळे आयपीएस म्हणून काम करण्याची संधी मिळेल असे वाटते. युपीएससी परीक्षेचा अभ्यास करताना सातत्य ठेवले पाहिजे. उजळणी भरपूर केली पाहिजे आणि मुख्य म्हणजे संयम ठेवला पाहिजे,' असे तो म्हणाला. आदित्यचे वडील धनंजय मिरखेलकर महापालिकेच्या पाणीपुरवठा विभागात ऑपरेटर होते, तर आई धनश्री महापालिकेच्याच शाळेत शिक्षिका होत्या. आदित्यचा मोठा भाऊ अजिंक्य यांचा पॅथॉलॉजीचा व्यवसाय आहे.