मुंबईसह राज्यात वाढत्या तापमानाच्या पार्श्वभूमीवर उष्माघाताचा धोका वाढत असल्याने नागरिकांनी योग्य ती काळजी घ्यावी, असे आवाहन बृहन्मुंबई महानगरपालिकेच्या सार्वजनिक आरोग्य खात्याकडून करण्यात आले आहे.

उन्हाचा तीव्र परिणाम शरीरावर होऊ नये यासाठी दुपारच्या वेळेत शक्यतो बाहेर पडणे टाळावे, भरपूर पाणी पिणे, हलके व सैल कपडे परिधान करणे तसेच लिंबूपाणी, ताक, नारळपाणी यांसारख्या द्रव पदार्थांचे सेवन करावे, असा सल्ला आरोग्य तज्ज्ञांनी दिला आहे.

लहान मुले, ज्येष्ठ नागरिक तसेच बाहेर काम करणारे कामगार यांनी विशेष खबरदारी घ्यावी, असेही महानगरपालिकेने स्पष्ट केले आहे. उष्माघाताची लक्षणे जाणवल्यास तात्काळ जवळच्या दवाखान्यात उपचार घ्यावेत, असेही आवाहन करण्यात आले आहे.

नागरिकांनी थोडीशी काळजी घेतल्यास उष्माघातासारख्या गंभीर समस्यांपासून स्वतःचे व कुटुंबाचे आरोग्य सुरक्षित ठेवता येईल, असा संदेशही सार्वजनिक आरोग्य विभागाकडून देण्यात आला आहे.