मुंबईतील प्रसिद्ध ठिकाण असलेले वांद्रे बँडस्टँड येथे समुद्रकिनारी बसलेले प्रेमीयुगुल पाण्यात पडल्याची घटना बुधवारी दुपारी घडली. पोलिस, अग्निशमन दलाचे जवान यांनी स्थानिक मच्छिमारांच्या मदतीने तरुणीला वाचविले; मात्र तरुणाचा रात्री उशिरापर्यंत शोध सुरू होता.

वांद्रे बँडस्टँडचा समुद्र किनारा धोकादायक असून कुणी पाण्यात उतरू नये, अशी सूचना देणारे फलक याठिकाणी लावण्यात आले आहेत. असे असतानाही याकडे दुर्लक्ष करून अनेकजण विशेषतः प्रेमीयुगुले पाण्यात उतरतात. बुधवारी दुपारी साडेबाराच्या सुमारास एक प्रेमीयुगुल खडकावर बसले होते. याचदरम्यान भरती आल्याने त्यांना सर्व बाजूंनी पाण्याने घेरले. यातून वाट काढत किनाऱ्यावर येत असताना पाण्याचा अंदाज न आल्याने दोघे बुडू लागले. हे पाहून मच्छिमार आणि वांद्रे पोलिसांनी घटनास्थळी धाव घेतली. बुडणाऱ्या तरुणीला बाहेर काढण्यात आले. तिला भाभा रुग्णालयात दाखल करण्यात आले आहे. तर, तरुणाचा शोध लागत नसल्याने नौदल आणि तटरक्षक दलाची मदत घेण्यात आली. रात्री उशिरापर्यंत हा तरुण सापडला नव्हता.