मुंबई: पश्चिम उपनगरांत सायकल चोरी करून उच्छाद घालणाऱ्या अट्टल चोरास दहिसर पोलिसांनी अटक केली. गणेशराम अभिलेश तिवारी ऊर्फ राजू चव्हाण असे त्याचे नाव असून त्याच्याकडून चोरीच्या महागड्या २२ सायकली हस्तगत केल्या आहेत. या चोऱ्यांमध्ये त्याच्या इतर साथीदारांचाही सहभाग असल्याची शक्यता आहे.

तरुणांमध्ये सायकलची क्रेझ अद्यापही कायम आहे. विशेष करून गिअरवाल्या महागड्या सायकलींना अधिक मागणी आहे. त्यामुळे या सायकली चोरण्याचे प्रमाणही जास्त आहे. नालासोपारा परिसरातील काही चोर दहिसर चेक नकामार्गे मुंबईत येऊन सायकल चोरी करत असल्याची माहिती दहिसर पोलिस ठाण्याचे गुन्हे प्रकटीकरण कक्षाचे उपनिरीक्षक श्रीकांत मगर, चंद्रकांत घार्गे यांना मिळाली. या माहितीच्या आधारे पोलिसांनी दहिसर चेकनाका परिसरात सापळा रचला. त्यानुसार या ठिकाणी आलेल्या गणेशराम याला ताब्यात घेतले. कसून चौकशीत त्याने सायकल चोरी केल्याची कबुली दिली. अधिक चौकशीत त्याच्याकडे गिअर असलेल्या २२ सायकली सापडल्या. या सायकलची किंमत अडीच लाख रुपये असल्याचे पोलिसांनी म्हटले आहे. दहिसर, बोरिवली. कांदिवली, मालाड या परिसरात पार्क करण्यात आलेल्या महागड्या सायकल गणेशराम चोरतो. त्याच्या अटकेमुळे दहिसरमधील तीन, तर कस्तुरबा मार्ग पोलिस ठाण्यातील एक गुन्हा उघडकीस आला आहे.

रेसिंगसाठी वापरल्या जाणाऱ्या गिअरवाल्या सायकलींना तरुण वर्गात चांगली मागणी आहे. ३० ते ३५ हजारांच्या सायकली गणेशराम स्वस्तात विकतो. नाममात्र किंमतीमध्ये चांगली सायकल मिळत असल्याने कोणीही घेण्यास तयार होत असे. दुसरीकडे सायकलचोरीची तक्रार विशेष कुणी दाखल करत नसल्याने गणेशरामचे फावले होते. त्याने किती सायकल चोरून            विकल्यायाचाशोध            पोलिस   घेत             आहेत.