मुंबई: पूर्व द्रुतगती महामार्गावरून चेंबूर सांताक्रूझ लिंक रोडवरून बीकेसीच्या दिशेने सुरू होणारा सुखकारी प्रवास...त्यानंतर कुर्ला सीएसटी रोड ते एलबीएस रोड जंक्शनवरची अभूतपूर्व रखडपट्टी...त्यापुढे बीकेसीतील सात सिग्नलवरील रखडपट्टी...हा वेळखाऊ प्रवास लवकरच इतिहासजमा होणार असून पूर्व द्रुतगती महामार्गावरून जेमतेम १५ मिनिटांत थेट बीकेसीत दाखल होता येणार आहे. पूर्व द्रुतगती महामार्गावरील चुनाभट्टी ते वांद्रे कुर्ला कॉम्प्लेक्स (बीकेसी) जोडणारा उड्डाणपूल या महिन्याच्या अखेरीस वाहतुकीसाठी खुला होणार आहे.

१.६ कि.मी. लांबीचा हा उड्डाणपूल सुरू झाल्यानंतर विशेष करून एलबीएस रोड, शीव तसेच कुर्ला सीएसटी रोड येथील वाहतूककोंडी लक्षणीयरित्या कमी होण्याची शक्यता आहे. ऑक्टोबर २०१८ सालीच या पुलाचे बांधकाम पूर्ण होणे अपेक्षित होते. मात्र जमीन संपादन, प्रकल्पग्रस्तांचे पुनर्वसन, रेल्वे मेगा ब्लॉक आदी अनेक कारणांमुळे प्रकल्पास विलंब लागला.

या पुलासाठी सोमय्या मैदान येथील विकास आराखड्यातील रस्त्याचा काही भाग आवश्यक होता. त्यासाठी परवानगी मिळवण्यात काही दिवस खर्ची पडले. चुनाभट्टी परिसरात टाटा वीज कंपनीच्या वीज वाहिन्या तसेच विजेचे टॉवर होते. या वाहिन्यांचे स्थलांतर करणे आवश्यक होते. त्यासाठीही वेळ गेला. हा उड्डाणपूल हार्बर रेल्वेचे चुनाभट्टी स्थानक, तर मध्य रेल्वेवरील शीव स्थानकाच्या वरून जाणारा आहे. त्यामुळे रेल्वे ट्रॅकवर काम करावे लागले. या कामासाठी रेल्वेचे विशेष मेगा ब्लॉग घेण्यात आले.

सोमय्या मैदान चुनाभट्टी येथून पूल सुरू होईल. त्यानंतर चुनाभट्टी व शीव रेल्वे स्थानक, एलबीएस रोड व मिठी नदी असा प्रवास करत उड्डाणपूल बीकेसीत डायमंड बोर्जच्या मागील बाजूस उतरेल.