धारावी पुनर्विकास प्राधिकरणाने राबविलेल्या निविदा प्रक्रियेत पात्र ठरलेल्या सेकलिंक कंपनीला प्रकल्पाचे काम सुरू करण्यासाठी सरकारने पत्र देणे आवश्यक आहे. पण धारावी पुनर्विकासाचे काम अदानी कंपनीला देण्याचा घाट घातला जात आहे. त्यामुळेच राज्य सरकारने धारावीचा पुनर्विकास रखडवला, असा आरोप धारावी पुनर्विकास समितीचे निमंत्रक राजेंद्र कोरडे यांनी केला.

धारावीचा पुनर्विकास तातडीने सुरू करावा, या मागणीसाठी धारावी पुनर्विकास समितीमार्फत रविवारी धारावीत सभा आयोजित केली होती, या सभेत ते बोलत होते. या सभेला धारावीतील हजारो लोक उपस्थित होते.

कोरडे म्हणाले की, 'काँग्रेस-राष्ट्रवादी आणि सेना भाजप सरकारने हा प्रकल्प जाणीवपूर्वक रखडवला आहे. १५ वर्षांहून अधिक काळ प्रकल्प रखडल्याने धारावीकराना मरणयातना सहन कराव्या लागत आहेत. त्यामुळे सरकारने प्रकल्पाचे काम तरी सुरू करावे किंवा एसआरए प्रकल्पाचे प्रस्ताव स्वीकारावे. पुनर्विकासासाठी लोक आता जागरूक झाले असल्याने सरकारने तातडीने प्रकल्पाचे काम सुरू करावे. अन्यथा रास्ता रोको, रेल रोको आंदोलन करावे लागेल.' समितीचे सदस्य अनिल कासारे यांनी धारावीकरांच्या व्यथा मांडल्या. रामापेक्षा आमचा वनवास अधिक झाल्याची भावना त्यांनी मांडली.