घणसोलीमधील गोठिवली गावात फरसाण आणि वेफर्स बनविण्यासाठी हॉटेलमधील वापरून झालेले काळे तेल वापरले जात असल्याचा धक्कादायक प्रकार उघडकीस आला आहे. अशा प्रकारे वापरलेले तेल पुन्हा पुन्हा वापरून नागरि आरोग्याशी खेळ केला जात होता. एका जागरुक नागरिकाने हा सर्व प्रकार समोर आणला आहे. त्याने केलेल्या तक्रारीवरून अन्न औषध प्रशासनाने या कारखान्यावर कारवाई केली असून हा प्रकार थांबवला आहे. हा कारखाना त्वरित बंद करण्यात आला असून येथील तेलाचे नमुनेही तपासणीसाठी प्रयोगशाळेत पाठवले आहेत. 

शहरातील हॉटेलांमध्ये वापरून झालेले काळे तेल या कारखान्यात आणले जात होते आणि त्या तेलात फरसाण, वेफर्स तयार केले जात होते. गावामध्ये असणाऱ्या अशा दुकानात फारसे कुणाचे लक्ष जात नाही. त्यामुळे सर्व नियम धाब्यावर बसवून येथे हे प्रकार सुरू होते. अत्यंत घाणेरड्या वातावरणात येथे हे पदार्थ तयार केले जात होते . गावातील नयन म्हात्रे यांच्या लक्षात हा सर्व प्रकार आला. त्यांनी या सर्व प्रकारचे मोबाइलमध्ये चित्रीकरण केले. एका टेम्पोमधून हे वापरलेले तेल येथे आणले जात होते. तेलाच्या डब्यांना कोणतेही सील नव्हते . घाणेरड्या कापडानेच त्यांची तोंडे बंद केली होती. त्यांनी हा सर्व प्रकार रबाळे पोलिसांना सांगितला. पोलिसांनी त्यांना अन्न व औषध प्रशासनाकडे या सर्व प्रकाराची तक्रार करण्यास त्यांना सांगितले. त्यानुसार म्हात्रे यांनी त्याची तक्रार केली. त्यांच्या तक्रारीची दखल घेत अन्न व औषध प्रशासनाने या कारखान्यावर धाड टाकून सर्व प्रकार बघितला आणि तात्काळ काम थांबविण्यास सांगितले. हा कारखाना बंद करण्याची नोटीस देऊन येथील मालाचे तेलाचे नमुने तपासणीसाठी प्रयोगशाळेत पाठवून दिले. प्रयोगशाळेचा अहवाल येईपर्यंत हे खाद्यपदार्थ विक्री करण्यासही त्यांनी मनाई केली आहे.