मध्य रेल्वेवरील रेल्वे तसेच मेट्रोने जोडल्या गेलेल्या  घाटकोपर स्थानकातील प्रवाशांच्या त्रासात पुढील आठवड्यापासून आणखी भर पडणार आहे. घाटकोपर स्थानकातील कल्याण दिशेकडील आणि सीएसएमटी दिशेकडील पादचारी पूल बंद करण्याचा निर्णय मध्य रेल्वेने घेतला आहे. तर नायगाव स्थानकात नवीन पूल खुला करण्यात आल्यामुळे या स्थानकातील जीर्ण पूल पश्चिम रेल्वेकडून १३ एप्रिलपासून पूल बंद करण्यात येणार आहे. 

घाटकोपर स्थानकात एकूण तीन पादचारी पूल आहेत. यापैकी कल्याण दिशेकडील पुलाची १९६७ साली तर सीएसएमटी दिशेकडील पुलाची उभारणी १९७० मध्ये करण्यात आली होती. पूर्वेला महामार्ग, जलद-धीम्या लोकलची जोडणी आणि मेट्रोमुळे 'गारेगार प्रवास' अशा उत्तम 'कनेक्टिव्हीटीमुळे' घाटकोपर स्थानकात प्रवाशांचा मोठ्या प्रमाणात राबता असतो. गर्दीच्या वेळेत तिन्ही पुलांवर गर्दीतून वाट शोधण्यासाठी प्रवाशांना चांगलीच कसरत करावी लागते. स्थानकातील मध्यभागाकडील पुलाची जोडणी मेट्रो स्थानकाला असल्यामुळे या पुलावर प्रवाशांची वर्दळ मोठ्याप्रमाणातअसते. 

घाटकोपर स्थानकातील सीएसएमटी दिशेकडील आणि कल्याण दिशेकडील पुलाच्या पायऱ्या पुर्नबांधणीसाठी बंद करण्यात येणार आहेत. कल्याण दिशेकडील पुलाच्या फलाट क्रमांक एकवर उतरणाऱ्या पायऱ्या १८ एप्रिल ते ४ मे या कालावधीत बंद ठेवण्यात येईल. तर सीएसएमटी दिशेकडील पादचारी पुलाच्या पायऱ्या १७ एप्रिलपर्यंत बंद राहणार असल्याचीमाहितीमध्यरेल्वेनेदिली. 

दरम्यान, पश्चिम रेल्वेच्या नायगाव स्थानकात नुकताच मुंबई रेल्वे विकास महामंडळाने उभारलेला पूल प्रवाशांसाठी खुला करण्यात आला आहे. यामुळे नायगाव स्थानकातील फलाट क्रमांक ४ वरील जुन्या पादचारी पुलाच्या दक्षिण दिशेला उतरणाऱ्या पायऱ्या वापरण्यास बंद करण्यात येतील. नवीन पुलाचा वापर वाढावा, म्हणून जुना पादचारी पूल बंद करण्यात येत असल्याचे कारण पश्चिम रेल्वेने पूल बंद करताना दिले आहे.