पंतप्रधान नरेंद्र मोदी आणि भाजप यांच्यावर जोरदार हल्ला चढविणारे महाराष्ट्र नवनिर्माण सेनेचे अध्यक्ष राज ठाकरे शनिवारी गुढीपाडव्यानिमित्त शिवाजी पार्क येथे होणाऱ्या जाहीर सभेत कोणा कोणाला लक्ष्य करणार याविषयी राजकीय क्षेत्रात कुतूहल आहे. राज भाजपसोबतच शिवसेनेवरही आरोप करणार का तसेच काँग्रेस राष्ट्रवादीच्या उमेदवारांना उघडपणे मदत करण्याविषयी बोलणार का याविषयी उत्सुकता आहे. 

पंतप्रधान नरेंद्र मोदी आणि भाजपचे राष्ट्रीय अध्यक्ष अमित शहा यांना राजकारणाच्या क्षितिजावरून नाहीसे करा. असे याआधीच सांगत राज ठाकरे यांनी भाजपच्याविरोधात जोरदार आघाडी उघडलेली आहे. भाजपचे उमेदवार कोणत्याही परिस्थितीत निवडून येता कामा नयेत असे राज यांनी सांगितल्याने मनसैनिक त्यादृष्टीने कामाला लागले आहेत. मात्र भाजपवर टीका करणाऱ्या राज यांनी शिवसेनेसोबत फारशी भूमिका मांडलेली नाही. शिवसेना आणि भाजप यांची युती असल्याने शिवसेनेबाबतची भूमिका राज यांनी स्पष्ट करावी, अशी मनसैनिकांची अपेक्षा असून शनिवारच्या सभेत ते शिवसेनेसोबत नेमकी काय भूमिका मांडत आहेत याकडे त्यांचे लक्ष लागलेले आहे. 

मुंबई आणि महाराष्ट्रातील अनेक जिल्ह्यात मनसेचे पदाधिकारी तसेच कार्यकर्ते कार्यरत आहेत. मनसे लोकसभा निवडणूक लढविणार नसल्याने या पदाधिकारी कार्यकत्यांनी नेमके कोणाचे काम करायचे याबाबत अद्याप स्पष्टता नाही. मनसेचे प्रमुख नेते पक्षाच्या बैठकांमधून खासगीमध्ये पक्षाची नेमकी भूमिका स्पष्ट करीत असले तरीही त्यांना राज ठाकरे यांच्याकडून पक्षाची भूमिका ऐकण्यात रस असल्याचे समजते. त्यामुळे शनिवारच्या सभेत राज ठाकरे नेमके कोणाचे काम करायचे हे स्पष्ट शब्दांत सांगतात का, तसे नसेल तर ते अप्रत्यक्षरित्या तरी आघाडीबाबत काही बोलतात का ऐकण्यास मनसेच्या कार्यकत्यांसोबत इतर राजकीय पक्षाचे नेतेही उत्सुक असल्याचे समजते.