लो. टिळक रुग्णालयाच्या थॅलेसेमिया उपचार केंद्रामध्ये रक्त संक्रमणासाठी येत असलेल्या २८०पैकी १०७ मुलांना रक्तातून संसर्ग झाल्या प्रकरणाची गंभीर दखल घेऊन मुंबई महापालिकेने या हलगर्जीबद्दल रक्त संक्रमण अधिकारी डॉ. सूर्यनाथ त्रिपाठी यांच्यावर पालिकेने निलंबनाची कारवाई केली असली तरीही त्यांचे खासगी प्रॅक्टिस करण्याचे उद्योग सुरूच राहिले आहेत. मुंबईतील काही ठिकाणी खासगी लॅबमध्ये त्रिपाठी हे बिनदिक्कत प्रॅक्टिस तसेच स्वाक्षरीचा वापर करू देत असल्याचे निदर्शनास आले आहे.

अतिरिक्त पालिका आयुक्त डॉ. अश्विनी जोशी यांनी या प्रकरणातील गांभीर्य लक्षात घेऊन निलंबनाची कारवाई केली. तरीही डॉ. त्रिपाठी यांनी खासगी लॅबमध्ये बिनदिक्कत प्रॅक्टिस सुरू ठेवली आहे. मुंबईच्या काही परिसरांतील लॅबमधील निदान अहवालामध्ये डॉ. सूर्यकांत त्रिपाठी यांची स्वाक्षरी असलेले अहवाल आहेत.

बऱ्याचदा गैरहजर असल्याच्या कारणास्तव डॉ. त्रिपाठी यांच्या वेतनात पालिकेने कपात केली होती. महाराष्ट्र मेडिकल कौन्सिलला दिलेल्या लेखी स्पष्टीकरणामध्ये लो. टिळक रुग्णालयाच्या रक्तपेढीमधील वरिष्ठ वैद्यकीय तज्ज्ञांनी डॉ. त्रिपाठी यांच्या गैरहजेरीची नोंद वारंवार करण्यात आल्याचे स्पष्ट केले आहे.

महाराष्ट्र असोसिएशन ऑफ प्रॅक्टिसिंग पॅथालॉजिस्ट या संघटनेने सन २०१६मध्ये अवैधरित्या स्वाक्षरी करून दिशाभूल करण्याच्या प्रकरणाचा सातत्याने पाठपुरावा केला होता. पालिकेने निलंबनाची कारवाई करूनही डॉ. त्रिपाठी हे खासगीरित्या प्रॅक्टिस कसे करतात यासंदर्भात विचारणा करण्यासाठी पालिकेच्या आरोग्य विभागाचे सहआयुक्त डॉ. सुनील धामणे यांच्याशी संपर्क साधून तो होऊ शकला नाही.