मुंबई: शाळेत एकत्र शिकलेली मैत्रीण बऱ्याच वर्षाने पुन्हा भेटल्यावर तिच्याशी जवळीक साधून बलात्कार करणाऱ्या नराधमाला टिळकनगर पोलिसांनी अटक केली. जेवण्याच्या बहाण्याने मित्राने हॉटेलमध्ये नेऊन लैगिंक अत्याचार केल्याचा आरोप या महिलेने तक्रारीत केला आहे.

शिवाजीनगर येथील म्हाडा कॉलनीमध्ये राहणाऱ्या एका तरुणाची भेट सन २०१७ यामध्ये शाळेतील मैत्रिणीशी झाली. बऱ्याच वर्षांनी भेटल्यानंतर त्यांनी एकमेकांचे मोबाइल क्रमांक संपर्कासाठी दिले. दोघेही एकमेकांच्या संपर्कात राहू लागले. या तरुणाने जेवणाच्या बहाण्याने महापे येथील सक्सेस हॉटेलमध्ये नेले. या ठिकाणी मित्राने जबरदस्तीने लैगिंक अत्याचार केले. यानंतर या महिलेने संपर्क तोडण्याचे प्रयत्न केले; मात्र हॉटेलमध्ये भेटल्याचे पती आणि घरच्यांना सांगेन अशी धमकी हा तरुण देऊ लागला. याच धमकीच्या आधारे त्याने वारंवार बलात्कार केल्याची लेखी तक्रार या महिलेने टिळकनगर पोलिस ठाण्यात केली. लेखी तक्रारीची प्राथमिक चौकशी केल्यानंतर यामध्ये तथ्य असल्याचे उघडकीस आले. त्यानंतर पोलिसांनी याप्रकरणात गुन्हा दाखल करून बलात्कार करणाऱ्यास अटक केली.