नवी मुंबई: मध्यरात्री वृद्ध आईला घराबाहेर काढणाऱ्या दोघा भावांची समजूत काढण्यासाठी गेलेल्या पोलिसांनाच धक्काबुक्की करून अरेरावी केल्याचा प्रकार सोमवारी पहाटे पनवेलध्ये घडला. या घटनेनंतर पनवेल शहर पोलिसांनी दोघा भावांवर सरकारी कामकाजात अडथळा निर्माण केल्याप्रकरणी गुन्हा दाखल करून दोघांना अटक केली आहे.

नागेश दिलीप जाधव आणि भारत दिलीप जाधव अशी आरोपींची नावे आहेत. हे दोघे सख्खे भाऊ पनवेलमधील डॉ. आंबेडकर पुतळ्याशेजारी रहाण्यास आहेत. या दोघांनी रविवारी मध्यरात्री वृद्ध आईला घराबाहेर काढले होते. त्यामुळे वृद्ध महिलेने मध्यरात्री पनवेल शहर पोलिस ठाणे गाठून मुलांनी व सुनांनी तिला घराबाहेर काढल्याची माहिती दिली. त्यामुळे पोलिस उपनिरीक्षक नीलेश राजपूत पोलिस कर्मचाऱ्यांसह वृद्ध महिलेला घेऊन रात्री दीडच्या सुमारास तिच्या घरी गेले. यावेळी पोलिसांनी दोघा भावांची समजूत काढून आईला घरामध्ये घेण्याबाबत तसेच तिचा सांभाळ करण्याची सूचना केली. मात्र, दारूच्या नशेत असलेल्या नागेश आणि भारत या दोघांनी 'हा आमचा कौटुंबिक प्रश्न आहे, तुमचा काय संबंध?' असे बोलून पोलिसांशी हुज्जत घालून आईला घरात घेणार नसल्याचे सांगितले. त्यानंतर दोघा भावांनी पोलिसांशी अरेरावी करून तसेच त्यांच्याशी भांडण करण्यास त्यांच्या बायकांना पुढे करून धिंगाणा घातला. त्यामुळे पोलिसांनी दोघा भावांना पोलिस ठाण्यात नेण्याचा प्रयत्न केला असता दोघा भावांनी पोलिसांसोबत धक्काबुक्की करून त्यांना अटकाव करण्याचा प्रयत्न केला. तासाभराच्या प्रयत्नानंतर पोलिसांनी दोघांना ताब्यात घेऊन पोलिस ठाण्यात आणले. त्यानंतर पोलिसांनी या पहाटे या दोघांवर गुन्हा दाखल करून दोघांना अटक केली. न्यायालयाने या दोघांची दोन दिवसांच्या पोलिस कोठडीत रवानगी केल्याची माहिती पोलिस उपनिरीक्षक राजपूत यांनी दिली. या प्रकरणात अटक करण्यात आलेल्या नागेश जाधव आणि भारत जाधव या दोघांनी वृद्ध आईचा सांभाळ न करता, त्यांना घराबाहेर काढल्याची तक्रार घेण्यात आली असून या तक्रारीनुसार चौकशी करून दोघा भावांवर व सुनांवर कारवाई करण्यात येणार असल्याचे पोलिसांनी सांगितले.