नागपूर: त्रिवेंद्रम एक्स्प्रेसमधून उतरताना सात वर्षांचा मुलगा गाडी व प्लॅटफॉर्ममधील फटीतून खाली रुळावर पडला आणि सर्वांच्याच काळजाचा ठोका चुकला. सुदैवानं मुलाला सुखरूप बाहेर काढण्यात यश आलं.

ही घटना आज सकाळी ७.३० वाजता नागपूर रेल्वे स्थानकावर घडली. गोरखपूर त्रिवेंद्रम एक्स्प्रेस सकाळी ७.३० च्या सुमारास प्लॅटफॉर्म दोन वर आली, या गाडीच्या बी-२ कोचमधून उतरताना एक सात वर्षाचा मुलगा प्लॅटफॉर्म व गाडीच्या फटीतून खाली पडताच आरडाओरड सुरू झाली. मुलगा खाली पडताच मुलाचे आईवडील रडायला लागले. गाडी सुरू झाली असती तर अनर्थ ओढवला असता. परंतु तिथं असलेले हमाल अब्दुल मजिद व प्रेमसिंग मीना यांनी तत्काळ गाडीकडे धाव घेऊन मुलाला बाहेर काढण्यासाठी प्रयत्न सुरू केले .शेवटी दुसऱ्या बाजूनं गाडीच्या खाली जाऊन मुलाला सुखरूप बाहेर काढण्यात आलं.

मुलाला सुखरूप बाहेर काढण्यात आल्यानंतर त्याच्या पालकांनी कुली अब्दुल मजिद व प्रेमसिंग मीना यांचे आभार मानले असून घटनेत मुलाच्या पायाला थोडी इजा झाली आहे.