सिगारेट ओढणे आरोग्यास हानीकारक आहे, …असा इशारा सिगारेट पॅकेटवर लिहिणे प्रत्येक विक्रेत्यास बंधनकारक असून अशा पाकिटामधील सिगारेट विकत नसल्याप्रकरणी कल्याण शहरातील व्यावसायिकावर पोलिसांनी छापा मारला. त्याच्याकडून १९ हजार रुपये किमतीच्या विदेशी सिगारेट्स जप्त करण्यात आल्या आहेत. धोक्याचे चिन्ह आणि इंग्रजी व भारतीय भाषांमध्ये सिगारेटमधील निकोटीनचे प्रमाण सिगरेटच्या पाकिटावर लिहिणे बंधनकारक आहे. परंतु कल्याण रेल्वे स्थानकासमोरील जय दुर्गा फरसाण अॅण्ड जनरल स्टोअरमध्ये विकण्यात येणाऱ्या सिगारेटवर असा कोणताच इशारा नव्हता. त्यामुळे महात्मा फुले पोलिसांनी कारवाई करून व्यवसायिक कैलास गुप्ता यास शनिवारी अटक केली. त्याच्याकडील १९ हजार रुपये किमतीच्या सिगारेट्सचे सहा बॉक्स जप्त केल्याचे पोलिसांनी सांगितले.