पहाटेची वेळ... रेल्वेच्या पार्सल डब्यात संशयास्पद प्रवेश... गाडी सुरू होताच धावत्या ट्रेनमधून पार्सल रुळांलगत फेकणे आणि पुढील स्थानकात उतरून पार्सल आपल्या ताब्यात घेऊन निश्चित स्थळी पोहोचवणे. हिंदी चित्रपटात शोभावा असा हा घटनाक्रम. नेमक्या याच पद्धतीने रेल्वेतील पार्सल चोरी करणाऱ्या टोळीच्या मुसक्या आवळण्यात मुंबई रेल्वे सुरक्षा बलाच्या जवानांना यश आले आहे. विशेष म्हणजे रेल्वेच्या पार्सलमधून नोटांचा व्यापार होत असल्याचे धक्कादायक वास्तव या तपासातून समोर आल्याने रेल्वे पार्सलच्या सुरक्षा यंत्रणेवर प्रश्नचिन्ह निर्माण झाले आहे. 

मुंबईला येणाऱ्या चेन्नई एक्स्प्रेसच्या सील केलेल्या माल डब्यातून सहा पार्सल चोरीला गेल्याच्या प्रकरणाचा तपास करताना दादर आरपीएफने आंतरराज्य टोळीला गजाआड केले आले. कल्याण स्थानकात एक्स्प्रेस थांबलेली असताना पहाटे ३ वाजण्याच्या सुमारास टोळीतील पाच जणांनी गाडीमध्ये प्रवेश केला. एक्स्प्रेसमध्ये प्रवेश करतानाची घटना सीसीटीव्हीमध्ये कैद झाली आहे. रेल्वे मुंबईच्या दिशेने रवाना झाल्यानंतर सायन स्थानकाजवळ रेल्वेतील सहा पार्सल रुळांजवळ फेकण्यात आली. त्यानंतर आरोपींनी दादर स्थानकात उतरत टॅक्सीने सायनला गाठले आणि फेकलेले पार्सल ताब्यात घेतले. या गुन्ह्यांतील टोळीपैकी चार आरोपींना अटक करण्यात आली असून उर्वरित एका आरोपीला लवकरच अटक करण्यात येईल, अशी माहिती मध्य रेल्वेचे वरिष्ठ विभागीय सुरक्षा आयुक्त के. के. अशरफ यांनी दिली. 

पार्सलमध्ये मिळालेल्या रोख रकमेबाबत महसूल आणि आयकर विभागाला पत्र लिहून माहिती देण्यात येईल. तसेच भविष्यात अशा घटनांना आळा घालण्यासाठी महत्त्वाच्या रेल्वे स्थानकांत पार्सल स्कँनर कार्यान्वित करण्याचे नियोजन असल्याचे वरिष्ठ विभागीय सुरक्षा के. के. अशरफ यांनी सांगितले. 

रेल्वेच्या पार्सलमध्ये रोकड सापडल्याने पार्सलच्या तपासणी यंत्रणेतील ढिसाळ कारभार समोर आला आहे. नियमांनुसार पार्सल डब्यात रोख रक्कम आणि ज्वलनशील पदार्थांना बंदी आहे. तरी देखील ६ लाखांची रोकड पार्सलमध्ये टाकून मुंबईला आणण्यात आल्याचे वास्तव समोर आले आहे. 

पार्सल चोरीच्या घटनेबाबत १८ जूलै रोजी दादर आरपीएफमध्ये गुन्हा नोंदवून तपास सुरू करण्यात आला. यावेळी ३५ हजारांचे पार्सल चोरीला गेल्याची नोंद करण्यात आली होती. तपासाअंती पार्सलमधील एकूण मुद्देमाल हा सुमारे ८ लाख रुपये किंमतीचा असल्याचे आरपीएफने स्पष्ट केले.