पूर व पावसामुळे आवक घटल्याने भाज्यांचे दर वाढले आहेत. मात्र, घाऊक बाजारातील दरांपेक्षा दुप्पट, तिप्पट किंमत आकारून किरकोळ बाजारातील विक्रेते ग्राहकांची अक्षरक्ष: लूट करत असल्याचे दिसून येत आहे. भाज्यांचे घाऊक दर, त्यात वाहतूक खर्च, सामान चढविण्याचा किंवा उतरविण्याचा खर्च आदी सर्वांचा विचार केला तरी किरकोळ विक्रेत्यांकडून भाज्यांचे दर खूपच जास्त लावले असल्याचे सोमवारी दिसून आले. 

मुंबई शहरात विक्री होणारी बहुतांश भाजी नवी मुंबईच्या वाशी येथील कृषी उत्पन्न बाजारपेठेतून आणली जाते. वाशी ते दादर किंवा वाशी ते अंधेरी किंवा वाशी ते वांद्रे यांसारख्या महत्त्वाच्या बाजारपेठांपर्यंतच्या प्रवासाचा विचार केल्यास वाहतूक खर्च फार नाही. याबाबत मुंबई टेम्पो असोसिएशनचे सॅमसन जोसेफ यांना विचारले असता, '२ टन अर्थात २ हजार किलो भाजी टेम्पोने आणण्याचे भाडे २ हजार रुपये आहे. कधीकधी पाऊस असल्यास २२०० रुपये भाडे असते. सामान चढविण्याचा खर्च ग्राह्य धरला तरी प्रतिकिलो फारफार तर ५ रुपये अतिरिक्त खर्च किरकोळ विक्रेत्यांना पडतो', असे त्यांनी सांगितले. 

वाशी येथील घाऊक बाजारपेठेत ३० किलोचे पोते टेम्पो किंवा ट्रकमध्ये चढविण्याचा माथाडी कामगारांचा दर फक्त ५ रुपये आहे. 

-२ टनाच्या एका टेम्पोत साधारण ६५ पोती मावतात. तेवढाच खर्च पोती खाली उतरविण्यासाठी येतो. त्यानुसार २ हजार किलोमागे अधिकाधिक ७०० रुपये याचा खर्च येतो. 

-याखेरीज बाजार समितीचा अधिभारही असतो. पण, त्याचा दर १०० रुपयांमागे ८० पैसे इतका माफक आहे. 

वाशीच्या घाऊक बाजारात सध्या भाजीचा सरासरी घाऊक दर ५० ते ५५ रुपये किलो आहे. २ हजार किलोचा विचार केल्यास १ लाख १० हजार रुपये मालाची खरेदी किंमत होईल. 

-वाहतूक आणि सामान चढविणे-उतरविण्याचा खर्च २७०० रुपये आणि अधिभार ११०० रुपये, यानुसार २ हजार किलोसाठी अधिकाधिक १ लाख, १३ हजार रुपये खर्च येतो. 

-प्रतिकिलोनुसार हा दर ५६ ते ५७ रुपये होतो. पण, किरकोळ बाजारातील भाजीचा सरासरी विक्री दर सोमवारी तब्बल १२० रुपये प्रतिकिलो अर्थात, दुप्पटीहून अधिक झाल्याचे दिसून आले.