पॅरोल रजा मिळाल्यानंतर फरार झालेल्या हत्येच्या गुन्ह्यातील कैदी तब्बल चार वर्षांनंतर पोलिसांच्या हाती लागला. ठाणे गुन्हे शाखा युनिट एकने या कैद्याला नाशिकमधून अटक केली. त्याला नाशिक ग्रामीण पोलिसांच्या ताब्यात देण्यातआलेआहे. 

रमेश नाईकवाडे (३८) असे त्याचे नाव आहे. तो मूळचा नाशिक जिल्ह्यातील पाटोदा येथील आहे. त्याच्याविरुद्ध येवला पोलिस ठाण्यात १७ मे २०१३ रोजी हत्येचा गुन्हा दाखल झाला होता. या गुन्ह्यात नाशिक रोड कारागृहात शिक्षा भोगणारा रमेश २७ जून २०१५ रोजी पॅरोलवर बाहेर आला. रजा संपल्यानंतरही तो कारागृहात हजर झाला नाही. या प्रकरणी गुन्हा दाखल करण्यात आला होता. दरम्यान, डोंबविली पोलिस ठाण्यात दाखल गुन्ह्यातील अन्य एका आरोपीचा शोध घेण्यासाठी गुन्हे शाखा युनिट एकचे पथक येवला येथे गेले होते. त्यावेळी रमेशविषयी पोलिसांना माहिती मिळाली. त्या आधारे सहाय्यक पोलिस निरीक्षक संदीप बागुल आणि त्यांच्या पथकाने रमेशला त्याच्या घरातूनच ताब्यात घेतले.