मुंबई : ताडीचे अतिसेवन करून तेथीलच शौचालयात पडल्याने एक ग्राहक जखमी झाला. त्यातच मालकाने शुद्धीवर येण्यासाठी त्याला सूर्यफुलाचे तेल लावले. यात त्याचा त्रास आणखी वाढल्याने ग्राहकाचा उपचाराचा खर्च वाचविण्यासाठी त्याला शनिवारी रात्री रस्त्यावर फेकले. तसेच पुरावा मिटविण्यासाठी त्याचा मोबाइलही गायब केला. मात्र नैसर्गिक मृत्यू वाटणारा हा प्रकार हत्या असल्याचे उघड झाले आणि अवघ्या सहा तासांत तिघांना खार पोलिसांनी अटक केली.

खार पश्चिमच्या रोड क्रमांक १७ वर एक व्यक्ती बेशुद्धावस्थेत सापडल्याचा फोन पोलीस नियंत्रण कक्षाला आला. त्यानुसार खार पोलिसांनी घटनास्थळी धाव घेत त्या इसमाला रुग्णालयात दाखल केले. डॉक्टरने त्याला तपासले तेव्हा अंतर्गत दुखापत झाल्याने त्याचा मृत्यू झाल्याचा अंदाज व्यक्त केला. नंतर डोक्याला दुखापत झाल्याने त्याचा मृत्यू झाल्याचे शवविच्छेदन अहवालात उघड झाले.

या प्रकरणी वरिष्ठांच्या मार्गदर्शनाखाली पोलीस निरीक्षक दया नायक आणि नंदकिशोर गोपाळे यांनी तपास सुरू केला. त्याच दरम्यान मयताची आई विमल मोरे (६०) या पोलीस ठाण्यात आल्या. त्यांचा मुलगा सुनील (३९) हा ताडी पिण्यासाठी गेला होता आणि परतलाच नाही, असे त्यांनी पोलिसांना सांगितले. तेव्हा रुग्णालयात मयताची ओळख पटली. त्यांचा जबाब पोलिसांनी नोंदविला. त्यादरम्यान सुनीलचा मोबाइल गायब असल्याचे मयताची आई विमल मोरे यांनी पोलिसांना सांगितले.