तापाने फणफणली मुंबई
पावसाचा जोर वाढता असताना मुंबईमध्ये तापाचा जोरही चांगलाच वाढला आहे. गेल्या आठवड्याच्या तुलनेमध्ये सार्वजनिक आणि खासगी रुग्णालयाच्या ओपीडीमध्ये बारा ते पंधरा टक्के रुग्णसंख्या वाढली आहे. संसर्गजन्य तापासोबत डोकेदुखी, सर्दी, खोकला, घसादुखी आणि अंगदुखी ही समान लक्षणे दिसून येत आहेत. सार्वजनिक रुग्णालयांमध्ये अनेक ठिकाणी पाय ठेवायलाही जागा नाही. रुग्णांना दाखल करून घेतल्यानंतर फ्लोअर बेडदेखील कमी पडत असल्याचे चित्र आहे. प्रत्येक वर्षी पावसामध्ये हे आजार उचल खातात त्यामुळे रुग्णालयांनी रुग्णसेवेच्या दृष्टीने पूर्वतयारी करून ठेवल्याचे रुग्णालय प्रशासनाकडून सांगण्यात येते.
यावर्षी पोटाचे विकार आणि गॅस्ट्रोची साथही वेगवेगळ्या ठिकाणी सुरू असल्याचे दिसते. सेंट जॉर्जेस रुग्णालयाचे वैद्यकीय अधीक्षक डॉ. मधुकर गायकवाड यांनीही संसर्गजन्य तापाच्या रुग्णांची संख्या वाढली असल्याचे सांगितले. संसर्गजन्य तापाची लागण एका व्यक्तीकडून दुसऱ्या व्यक्तीला होत असते त्यामुळे प्रत्येक वर्षी या कालावधीमध्ये तापाचा जोर वाढतो असे ते म्हणाले. मांटुगा येथे प्रॅक्टिस करणाऱ्या डॉ. हेमलता माटवे यांनीही मलेरिया, डेंग्यूसारख्या तापामुळे येणाऱ्या रुग्णांची संख्या वाढल्याचे सांगितले. संसर्गजन्य आजारांसह मुंबईच्या काही भागांमध्ये या प्रकारच्या तापाचा जोर वाढत आहे.