मुंबईत शनिवारी सकाळपासून पावसाच्या सरी सुरू होत्या. भरतीच्या उंच लाटा उसळत असल्याने मुंबईकर आणि पर्यटक यांनी समुद्रकिनाऱ्यावर गर्दी केली होती. मरिन ड्राइव्ह, गेट वे ऑफ इंडिया, गिरगाव चौपाटी, महालक्ष्मी, हाजीअली, वरळी सी फेस, दादर, जुहू, गोराई, आकसा बीच या ठिकाणी लहान मुलांसह तरुण-तरुणी मोठ्या संख्येने उपस्थित होते. पोलिस तसेच जीवरक्षक हे पर्यटकांना किनाऱ्यापासून दूर राहण्याचे आवाहन करताना दिसत होते. मात्र, तरीही पोलिसांची नजर चुकवून लाटा अंगावर घेण्यासाठी अनेकांचे प्रयत्न सुरू होते. मरिन ड्राइव्ह समुद्रकिनारी दुपारी अडीचच्या सुमारास दोन तरुण कठड्यावरून खाली खडकांवर उतरले. जोरदार लाटांमुळे ते समुद्रात खेचले गेले. पोहता न आल्याने दोघेही बुडू लागताच किनाऱ्यावरील लोकांनी आरडोओरड केली. पोलिस आणि अग्निशमन दलाचे जवान घटनास्थळी पोहोचले. समुद्र खवळलेला असल्याने दोघांचा शोध घेण्यात अडचणी येत होत्या. त्यामुळे नौदलाला पाचारण करण्यात आले. हेलिकॉप्टर आणि डायव्हर्सच्या मदतीने नौदलाने शोधमोहीम हाती घेतली. रात्री आठ वाजताच्या सुमारास दोघांपैकी जावेद खान (२२) याचा मृतदेह हाती लागला, तर दुसऱ्याच्या मृतदेहाचा शोध उशिरापर्यंत सुरू होता.

दुसरीकडे नेव्हीनगर येथील गीतानगर येथे साहिल हुसेन (१४) हा मित्रांसोबत खेळण्यासाठी पाण्यात उतरला. मात्र, खोलीचा अंदाज न आल्याने तो बुडू लागला. याबाबतची माहिती मिळताच अग्निशमन दलाचे जीवरक्षक घटनास्थळी पोहोचले आणि साहिल याला सुरक्षित बाहेर काढले.

वांद्रे बॅण्डस्टॅण्ड : मिथुनकुमार कारियार (२९) हा तरुण बुडाला

- मरिन ड्राइव्ह : गिरगावमध्ये राहणारा भैरव बारियाचा बुडून मृत्यू

- जुहू : चौपाटीवर पोहताना रिक्षाचालक महेश शिंदे बुडाला