लो. टिळक रुग्णालयामधील रक्तपेढीमध्ये एफडीएप्रमाणित असलेल्या दोन रक्तसंक्रमण अधिकाऱ्यांकडे अध्यापनाची जबाबदारी आहे. त्यामुळे नियम असूनही ते स्वतः कधीही रक्तसंकलन शिबिरामध्ये सहभाग घेत नाहीत. दाता कोणत्या प्रकारचे रक्त देतो, रक्तदान करण्यापूर्वी दात्याचे एकापेक्षा अनेकांसोबत लैंगिक संबध आले होते का, त्याला कोणता संक्रमित होणारा आजार आहे का, याची माहिती घेणे गरजेचे असते. ती न घेतल्यास रक्तातून होणाऱ्या संसर्गाची लागण इतरांना होऊ शकते. प्रत्यक्ष रक्तसंकलनाच्या वेळी शिकाऊ डॉक्टरांना वैद्यकीय अधिकारी म्हणून पाठवले जाते, असे रुग्णालयातील वरिष्ठ वैद्यकीय अधिकाऱ्यांनी खात्रीपूर्वक सांगितले.

त्यामुळे ज्या गांभीर्याने रक्तसंकलन करण्याची गरज असते, तो उद्देश सफल होत नाही. रक्तपेढीतील एका तंत्रज्ञाचा परवाना हा इतर खासगी पॅथालॉजी लॅबशीही जोडलेला आहे. त्यामुळे त्यांची उपस्थिती रक्तपेढीमध्ये अभावानेच असते. लैंगिक संबधांमधून संक्रमण, गरोदर आईकडून बाळाला तसेच, इंजेक्शनच्या सिरिंजद्वारे ही लागण होण्याची शक्यताही यामध्ये असते. मात्र, या प्रकरणामध्ये लहान मुलांमधील लैंगिक संबधांची शक्यता ग्राह्य धरता येत नाही. आईकडून बाळाकडे होणाऱ्या संसर्गाचे प्रमाण देशामध्ये नगण्य आहे. त्यामुळे एकट्या टिळक रुग्णालयाच्या थॅलेसेमिया केंद्रामध्ये मुलांना झालेल्या या हेपेटायटिस सी या संसर्गाचे प्रमाण काळजीचे ठरते.

रक्त संक्रमित करताना रक्त संक्रमण अधिकाऱ्याने तिथे उपस्थित असणे गरजेचे आहे. रक्त देण्यापूर्वी सर्व प्रकारची काळजी घेणे बंधनकारक आहे. तसे होत नसेल तर या प्रकाराची गंभीर दखल घेतली जाईल.

पालिका रुग्णालयामध्ये रुग्ण आणि डॉक्टरांचे प्रमाण व्यस्त असल्यामुळे तत्परतेने वैद्यकीय उपचार देता येत नाहीत, अशी ओरड कायम केली जाते. मात्र, टिळक रुगणालयातील रक्तपेढीमध्ये पुरेसे डॉक्टर उपलब्ध असताना असे प्रकार घडणे लज्जास्पद आहे. थॅलेसेमियासारख्या व्याधीमुळे आयुष्याशी संघर्ष करत असलेल्या मुलांना झालेल्या या नव्या संसर्गावर पालिकेने तातडीने उपचार सुरू करायला हवेत. पालिका रुगणालयाशी संलग्न असतानाही तोंडदेखली हजेरी लावून इतरत्र जोमात वैद्यकीय सेवा देणाऱ्या तंत्रज्ञांवरही कडक कारवाई करायला हवी.