वाढत्या साखळीचोरी, घरफोड्यांच्या गुन्ह्यांच्या पार्श्वभूमीवर पोलिसांनी कल्याण-डोंबिवली शहरासह ग्रामीण भागात गस्ती वाढवल्या आहेत. सोमवारी कल्याण शहरात पोलिसांची गस्त सुरू असताना दरोडाविरोधी पथकाने मोटारसायकलवर संशयास्पदरित्या फिरणाऱ्या इलियाराज केशवराजला याला ताब्यात घेतले. त्याच्याकडे चौकशी केली असता टोळीचा म्होरक्या सालोमन लाजर गोगुला हा आपल्या साथीदारांसह कल्याण पश्चिमेकडील मुरबाड रोडवर असणारी राष्ट्रीयीकृत बँक लुटण्यासाठी येणार असल्याची माहिती मिळाली. त्यावरून पोलिसांनी या बँकेच्या परिसरात सापळा रचून बँक लुटण्यासाठी आलेल्या ९ जणांना अटक केली. सालोमन लाजर गोगुला, संजय नायडू ,बेन्जीमन इरगदीनल्ला, दासू येड्डा, अरुणकुमार पेटला, राजन गोगुल, मोशा याकुब मोशा, डणीयल अकुला इलियाराज केशवराज अशी अटक आरोपींची नावे आहेत. या टोळीकडून पोलिसांनी ३ मोटरसायकल, मिरची पावडर, ३ कोयते, २ चाकू, ३ नायलॉन रश्शी, २ स्क्रू ड्रायव्हर, २५ मोबाइल हेंडसेट, २५ वेगवेगळ्या कंपन्यांचे सिमकार्ड असा मुद्देमाल हस्तगत केला. 

हे आरोपी एखादा फ्लॅट किंवा एखादा चाळीतील रूम भाड्याने घ्यायचे. आजूबाजूच्या बांधकाम सुरू असलेल्या साईटवर बांधकाम मजूर म्हणून काम करत असल्याचे भासवून दिशाभूल करत होते. बँकेत येणाऱ्या-जाणाऱ्या ग्राहकांवर नजर ठेवून त्यांचा पाठलाग करत. त्याच्या अंगावर घाण किंवा खाजखुजली टाकून त्यांचे लक्ष विचलित करत असत आणि त्यानंतर त्यांच्याजवळील मुद्देमाल लंपास करत असत. तसेच छोट्या बेचकीच्या आधारे कारची काच फोडून गाडीतील रोकड लुटण्याचे गुन्हेदेखील या टोळीने केले असल्यची माहिती पोलिसांनी दिली. ठाणे जिल्ह्यातील विविध पोलिस ठाण्यात सुमारे १५ ते २० गुन्हे त्यांच्यावर दाखल असून या आरोपींवर महाराष्ट्रातील औरंगाबाद, अहमदनगर, जळगाव, नागपूर, गोंदिया आणि कर्नाटक राज्यांत ५० हून अधिक गुन्हे दाखल असल्याचेही उपायुक्त पानसरे यांनी सांगितले.